أجمل سنين العمر

فعلا زي العنوان و بدون مبالغة
السنوات اللي قضيتها في المدرسة كانت من اجمل سنين عمري حتى بعد تخرجي من الكلية كل الناس كانوا يقولوا الكلية احلى ايام و انا اقول لأ مدرستي الثانوية احلى ايام
بجد مش بجامل حد و لا ببالغ بس ده كان ولازال احساسي بالفترة دي من عمري
الحقيقة انا مش عارفة اقول ايه او ابتدي موضوعي ازاي
فيه كلام كتير أوي نفسي اقوله
هبتدي ازاي عرفت المنتدى
بالصدفة امبارح كنت بدور على كيفية الاستفادة من الزجاجات الفارغة و لقيت فيديو يوتيوب على المنتدى و فرحت جدا ان مدرستي ليها موقع جميل كده وقررت اشترك علطول

ويسعدني و يشرفني اني اكون اول واحدة من خريجات المدرسة تكتب في القسم ده

انا كنت دفعة 96 - 97 وطلعت الرابعة على الدفعة
دخلت صيدلية عين شمس واتخرجت 2002
كل سنة في الكلية كنت بروح اسلم على كل مدرساتي و اساتذتي مرتين بعد كل نتيجة ترم و افرحهم و اعرفهم بتقدمي في الكلية
وبعد مخلصت كنت بروح مرة في السنة لحد ما عديت مرة و فوجئت بل فجعت ان المدرسة بتتهد
زعلت أوي وطول الطريق للبيت مقدرتش اوقف دموعي لأن كل شبر في المدرسة ليا فيه ذكريات جميلة وحسيت بجد ان جزء جوايا اتهد
ممكن تقولوا عليا ببالغ بس ده كان فعلا احساسي وقتهاومروحتش من ساعتها المدرسة ومحستش بفرحة تاني غير لما لقيت الموقع امبارح و اطمأنيت على مدرساتي و اساتذتي

لو موضوعي عجبكم ممكن اتكلم بالتفصيل عن ذكرياتي في المدرسةفي مشاركات تانية

شكرا لأدارة المدرسة و ادارة المنتدى انها اتاحت ليا الفرصة دي
وشكرا لكل من علمني ولو حرف وخاف على مصلحتي حتى لو زعلني علشان اكون انا دلوقتي
وربنا يجزي كل اللي علموني كل خير بدعيلهم بالخير كل ما افتكرهم بجد ربنا يكرمهم ويشوفوا اولادهم احسن ناس زي ما كانوا عايزينا نبقى احسن ناس