احلى اكله جمبرى- اكله نهايه الاسبوع

يالا بسرعه تعالو جيبالكو اكله خطيره


بدل مانمسك التليفون ونطلبها تجلنا
انا قررت ان احنا اللى هنعملها
بس المهم تقولولى رائيكو بس وحياتكو بسرعه
تعالو ندخل المطبخ ونشمر ادينا
ونقول بسم الله ابتدينا
على فكره الاول اى واحده قبل ما تطبخ
تقرا سورة قريش
لانها ليها بركه جميله ف الاكل
والاكل ما شاء الله بيطلع حلو




والمنيو النهارده هى
جمبرى مشوى
اقراص الجمبرى المقليه
جمبرى مقلى مقرمش
رز بالجمبرى بطريقه جديده وتحفه
شوربة جمبرى خطيره وجديده


الاول احب اقولك ان انا باستخدم نوعين جمبرى
جمبرى جامبو وده للشوى
وجمبرى وسط وده فباقى الوصفات
هنخلى شويه ونخلى الباقى بالقشر علشان هاعلمكو احلى شوربه

اولا هنبتدى بالجمبرى المشوى



باختصار كده هتجيبى الجمبرى تغسليه كويس وتقصى شنباته على فكره الشنبات دى بتزفر الاكل اوى


المهم تجيبى طاسه تيفال وتحطى فيها شوية زيت زيتون بسيط اوى
وتشوحى الجمبرى على الناحيتين
لحد ما ياخد لون حلو
بس ملحوظه تحطى دور دور مش كله على بعضه


الدور اللى يطلع تحطيه ف حلة حفظ الحراره
وترشى ملح وفلفل وليمون
وهكزا
وف الاخر تجيبى فحمه وتولعيها اوى
وتحطيها وسط الجمبرى مع نقطة زيت
ودوقى الطعم الخطير
بجد والله الناس بيتهبلو عليه
وما فيش اسهل من كده
وكمان نفس الطريقه باعملها ف السمك الفيليه




تانى حاجه وطعمها حلو اوى
اقراص الجمبرى المقليه
سهله جدا



انتى هتجيبلى الجمبرى المخلى
وممكن يكون وسط او صغير
وتنضفيه كويس من السلسله اللى ف الضهر
وتغسليه
وتتبليه ملح فلفل ليمون كمون شطه فلفل اخضر ناعم مع التوم



وترشى عليه شوية دقيقعلشان يلزق ف بعضه
وتجيبى طبق فيه دقيق
تاخدى كبشة جمبرى بايدك
وتحطيها ف طبق الدقيق بالراحه علشان ما يتفكش
وتقلبيها على الوش التانى
وتاخديها على ايدك تبططيها قرص بس كده
وتحطيها ف صينيه مرشوشه بالدقيق
وسيبيها لما ييجى ىالضيوف حمريها
بس ف طاسه مسطحه تيفال
والزيت يبقى حوالى 2سم
يعنى الاقراص تبقى راكزه على قاعده الطاسه وتحمريها من الوشين




بالذمه فيه اسهل من كده


اكمل ولا ايه




ثالثا الجمبرى المقرمش




بتتبليه نفس التتبيله


وتخلطى معاه شوية دقيق عليهم بيكنج بودر
وتجيبى طبق فيه دقيق كميه بسيطه مع بيكنج بودر
وتاخدى كبشة جمبرى بالتتبيله
وتقلبيهم ف الطبق اوى
وتحطى ف صينيه مرشوشه دقيق


ولما تخلصى
حطى باقى الدقيق ف الصينيه
وبلى ايدك مايه
وقلبى الجمبرى
وتبلى ايدك تانى وتقلبى بيها الجمبرى
تقلى ف زيت غزير
والنار متويسطه ما تكونش عاليه
ممكن تعمليها بالجمبرى المخلى
او جمبرى مخلى من القشره ومتساب الراس والذيل
بيطلع كرسبى واحلى من المطاعم بامانهفى مطعم اسمو البرج فى مدينه نصر بيعمل نفس الطعم





رابعا الرز بالجمبرى





سهل جدا جدا وطعمه رائع بجد
انتى هتعملى الرز عادى جدا
رز حبايه وحبايه طبعا عارفينه



وتجيبى الجمبرى المخلى تنضفيه وتغسليه


وتحطى بصلايه ف الكبه
وتحطيها مع شوية زيت على النار ف الحله لحد ماتصفر بس وتنزل ما يتها
وتضيفيلها الجمبرى
لغاية ما يشرب مايته ويتسبك
بس وترشى ملح وفلفل وكمون
وتطفى ووقت التقديم تخلطيه مع الرز
وتقلبيهم ف بعض
وتسوى السطح ف السرفيس وترشى على سطحه كمون وفلفل
الطريقه دى بتخلى الرز طعمه هايل
والجمبرى ما بيكشش
ملحوظه فيه انواع جمبرى بتنزل مايه كتير
فحاولى ف السوا تشيلى شوية مايه
علشان ما ياخدش وقت كبير ف التسبيكه وينشف منك ويجلد


ملحوظه كيلو الجمبرى المخلى
اعمليه على كوبايتين رز




لسه الشوربه استنو



خامسا احلى شوربة جمبرى
باذن الله الشوربه دى هتعجبكو اوى
وسهله كمان



هتجيبى الجمبرى الوسط ويكون بقشره
وتنضفيه من السلسله وتسيبيه على جنب
هتحطى ف الحله معلقتين زيت زيتون
وتشوحى بصله او اتنين متقطعين اربع
وطماطم وجزر
وبعدين تزوديهم مايه وتسيبيهم يتسلقو
هتاخديهم بعد السلق ف الخلاط
وتحطيهم يغلو تانى ف الحله
وتحطى الجمبرى
وما تسيبهوش كتير على النار
بيستوى بسرعه اوى
وترشى ملح وفلفل وكمون كتير
وشوفو طعمها وادعولى



ودى بقى سمكه مشويه هديه من عندى



متنسوش السلطه الخضراء وسلطه الطحينه




ودى بقى كوبايه شاى من عندى يالا




متنسوش الردود واقتراح صنف الحلو وهزعل اوى من اللى هيبص ويمشى من غير رد

وده بقى اول صنف حلو نعملو وهو



المهلبيه بالمكسرات
المقادير :



ـ 4 كوب لبن .



ـ 2 ملاعق كبيرة نشا.



ـ 1 ملعقة صغيرة فانيليا أو ماء ورد .



ـ 6 ملاعق كبيرة سكر .



ـ مكسرات مفرية حسب الرغبة .




الطريقة :



ـ توضع النشا في قليل من اللبن البارد .



ـ يحلى باقي اللبن ويرفع على النار حتى يغلى ثم تضاف النشا المذاب مع التقليب السريع بالمضرب .



ـ يرفع الخليط السابق على النار في حلة من النحاس مستديرة الجوانب يغلى مع التقليب المستمر لمدة من 7:5 دقائق حتى ينضج النشا وتضاف الفانيليا أو ماء الورد.



ـ تصب في طبق فرن ويرش على سطحها قليل من السكر البودرة وقطعة من السمن وتزج في الفرن حتى يحمرالوجه ثم تترك لتبرد ويرش فوق الوجه المكسرات المفرية وتقدم بالشكل ده
والف هنا